UR PIRC'HIRINAJ (30)

TON KOZH A-BOZ

Me'm boa lakaet em fenn, ur blez, mont da bardon

Santez-Anna-ar-C'hoad get mam brasañ mignon.

Me monet d'he c'havet un deiz àr ar pemdez

E'it goulenn he aviz geti àr gement-se.

Kent arriu en he zi me he gwel é redek

E'it dont en arbenn din beta korn he c'houarc'heg.

Ha hi c'houlenn genin, èl mah oa forzh souezhet :

Petra zo a nevez pand oc'h daet da'm gwelet?

Ya, hi c'houlenn genin: «Petra zo a nevez,

Pand oc'h daet da'm gwelet d'ar c'hours-mañ ag an deiz?»

— Me lâr dezhi: «Man dous, d'ho kavet eh on daet

E'it goulenn ho aviz àr ur soñj am eus gwraet.

Me 'm eus, pell 'zo amzer, lakaet e ma spered

Monet da bardon kaer Santez-Anna-ar-C'hoad;

Ha perak eh on daet, hiriv, betag ho ti

E'it goût mard oc'h koutant da zonet da'm heuli».

— «O geo sur eme-hi, a lâr-hi din joaius,

Mont da Santez-Anna, me yay ivez eürus.

Hag evit an deiz-se èl e'it ar gouel brasañ

Me lakay ma stiraj, mam brageris kaerañ.»

P'oamp arriu e chapel Santez-Anna-ar C'hoad,

Eno en em gave kalz ag hon mignoned.

Mar em boa plijadur, ha mar oa bras ma joa

E oa kaout man dous genin doc'h ma c'hostez.

Hag an dud etreze lâre doc'h hon gwelet:

«An daou zen yaouank-se sur mat zo dimezet».

Met mar lârent ur gaou ne oa ket bet forzh hir

Rak, Malarde àr-lerc'h, kement-se a oa gwir.

— Bremañ enta, man dous, daomp-ni hon daou d'ar gêr

Ha da Santez-Anna lâromp ar memp pater.

Lâromp àr hon daoulin evit bout selaouet:

Santez Anna-ar-C'hoad gwrait ma vehomb daou bried.