MA JILETOÙ GLOAN

(12)

TON GALLEG

Nend eus ket pell ’zo gwezharall,

— Ar mod chañch ag unan d’an all

Hemp bout bravoc’h —

Pa vehe c’hoazh an amzer-se,

Em wiskiñ a rahen get joa

Èl ma zad kozh.

2

Hennezh n’en doa get e vurenn,

Get marjennoù hag ur jagenn,

Met ur polpant

N’anave ket an danvez fin,

Razh e zilhad oa gwraet hempken

Get lien, gloan.

3

Met, setu c’hoazh ur mod nevez,

Ar jiletoù waet e gouarn-Doue

Evit ur blouz {ur blouz}.

Bremañ ne vo ket mui dober

A vil bouton èl ma lârer

Nag a voulouz.

4

Hañval doc’h marc’hadizion blev,

Ni c’hell bout divoem pe bout mezv

Hemp em chifiñ.

Ni c’hell monet da rudellat

Hemp gober memp droug d’an dilhad

’Vo àr hor kein. {àr hor c’hein}

5

Met me lâr deoc’h, hemb bout sorser

Ni roay hor blouz d’ar pilhoter

Hemp netra koll.

Rak sur mat en ur berr amzer

Ar chupennoù prenet e kêr

’Wisko an holl.

6

Neuze ne vo ket anavet

Na tudjentil na peizanted,

Ha gwell-ar-se.

Met, marse ni a vo en-dro

Èl dianvaezour en hor bro?

Dam! Gwazh-ar-se.

7

Evidon-me, me chom digas

Doc’h ar modoù; m’o laosk da bas.

— Libr peb unan —

Ha nag e vevehen kant vlez,

Me wisko e-pad mam buhez

Jiletoù gloan.