MA MAMM-GAER (14)

TON: La mère Angot.

Klevet am eus ’lies lâret

Get an dud a viskoazh,

Ha kement-se greden berped

Rak n’er gouien ket c’hoazh

Penaos ar vammoù-gaer {ar vammeu-gaer !!!}

A vez dalc’hmat gwall-loen.

Me garehe kaout teir, {kavoet tér}

Ya, sur mat, a greiz kalon.

2

Rak kement-se zo ur gaou mat,

Ha ne nac’han ket tamm,

Ar wellañ maouez ag ar c’hornad

Zo da ma mestrez mamm.

Ha doc’h mah vo man doar’, {doare}

Mar bin intañv un deiz,

Nag e vo da ma mamm-gaer

E roin holl ma c’harantez.

3

Da vitin a-benn pa sava

Hi ra deomp ar c’hafe,

Get un tammig mat a vara

Da man dousig ha me.

Anezhi komziñ fall

E rahen ur pec’hed.

Ne rae ket sur kement ’rall

A pa oa bev he fried.

4

A pa yaomp ni d’ar pardonioù

D’ar marc’had pe d’ar foar,

Man dous ha me a ya hon daou,

Ma mam-gaer chom er gêr ;

Ha goude kement-se,

— Me lâr hemp mezh erbet —

Ma mamm-gaer a ra arre

Razh ar labour, èl berped.

5

Arriuet un deiz e oa daet

Ma mamm-gaer d’out mamm-gozh. {Dout = da vaout}

D’out komer am boa-hi lakaet

Èl mah oa é c’hortoz.

E’it bout gwraet plijadur

Ur wezh e mam buhez,

Da ma mamm-gaer, a-dra-sur,

Em boa gwraet ’walc’h an deiz-se.

6

Met mar varvan-me ar c’hentañ,

Ma mamm-gaer àr ma lec’h,

Me laro sur, ar vamm wellañ

En doa roet din he merc’h.

Ivez, e’it he enor,

Me c’houlenno get sant Pêr

Mah tigoro bras an nor

E’it mah paso ma mamm-gaer.