PONT MOÑJOE

TON A RE BOTREL

Piv n’en deus ket en e vuhez

Klevet kaozeal a Bont Moñjoe?

Brudet eo bet-hag ar Faoued.

Eñv ar brasañ àr wazh Treskoad,

Kenevit heni Roskade.

2

Eñv zo ur pont mod gwezharall,

Ar loened a bas en tu ’rall

É vont er wazh bet-hag o c’hein.

An dud a bas a ziàr ar vein

É skampiñ ag unan d’an all.

3

Don eo eno en ur stankenn,

A-barzh e pas div vinojenn,

Daou hent bihan a ra ivez

Met ret eo mont a blom d’ar laez

Evit arriu àr ar votenn.

4

Kent e oa darempredet mat

Get holl an dud ag er c’hornad.

E'it monet en tu ’rall d’ar wazh,

Eno dalc’hmat e arriuec’h,

Mar beze genoc’h ur c’harrad.

5

A Bont-Moñjoe da Gêrdangi,

Heni monet, ne c’houlenno mui,

Get ur c’harr, en un hent ken fall,

Ha neoazh an dud gwezharall

A base a-barzh èl c’hoari.

6

Bremañ pand eo gwraet an hent bras

Nend aer ket mui a blom d’an dias.

Da glask hent bihan Pont-Moñjoe,

Aesoc’h eo heni Roskade,

’Menn e paser hemp gober kaz.

7

Kenavo deoc’h pontig Moñjoe,

Dilezet oc’h e’it Roskade.

Nend ay ket mui ken re ar vro

Da bas àrnoc’h, met re an dro;

Mar gellant e chañchint ivez.