AN NEIZH MOUALC'H (28)
TON: Viens Poupoule.
1
Un deiz é vale 'barzh ar c'hoad
Me gavas un neizh moualc'h;
Ur skeul vat oa ret da gaout
E'it gellout mont d'er «c'hlac'h»;
Met p'oan arriu e-tal an neizh,
Ma skeul a oa re verr,
Hag en ur astenn c'hoazh mam brec'h
Dapen ket a hanter
An neizhioù — A zo traoù — Pa vênt àr ar barroù,
Ha ma nend oc'h ket daou
Eit kaout an uioù,
Ma diaes — Deoc'h 'liés — E'it krapiñ d'ar lein aes
Rak an neizhioù zo traoù
E'it torriñ ho mambroù.
2
Berped em eus bet plijadur
É hont da galsk neizhioù,
Ha kalz muioc'h c'hoazh a-dra-sur
A pa gaven uioù,
Hag a pa gaven un neizh moualc'h,
Èl holl ar vugale,
É welet pevar ui glas a-barzh
E kreske c'hoazh ma joa.
A viskoazh — Neizhioù — A vez diaes da «glac'h»
Ha chom a ra trawalc'h,
— Ne vênt ket kavet razh —
Rak berpet — Faot lâret emaint dalc'hmat kuzhet.
En dezerzh a viskoazh
E vez an neizhioù moualc'h.
3
Bremañ nend on ket stummet ken
Da glask an neizhenn moualc'h,
Gwell e vehe din 'benn ar fin
Kavout ur pezh a blac'h.
Setu me pell 'zou é c'hortoz
E ti ma zud er gêr,
Marse eh eus unan dispos
Ha koutant da 'm c'hemer.
Ya, unan — E-unan — Ne vern bras pe bihan
Rak pell mat e kavan
Ma-unan e choman.
Hag un deiz — Lan a joa — Me zimezo neuze
Meit dreist-holl e kredan
Karantez ar gwellañ.
4
Bremañ, e laoskin da'm aviz
An neizhioù, a-kostez
E'it mont bep Yaou d'ober ar lez
Da foarioù Gemene,
Ma ne gavan heni erbet
Me yay bet-hag Pondi,
Me yay tre bet-hag ar Faoued
El lec'h chom hemp heni.
Met merc'hed — Ne faot ket — Na grediñ gwezh erbet,
Ne ouiont ket lâret
Namaet gaouier berped.
'Faot kredein — A gav din — P'o c'hlevit é kontiñ
En eskemm kaer berped
D'ar pezh o dez lâret.
5
Kement-se zo kaoz a viskoazh
E choman hemp heni
Rak me grede ar gevier razh
A lârent da heuli,
Met pandeogwir eh on desket
Da glask an neizhoù moualc'h,
Ar wirionez eo din gwelet
E-mesk ar gevier razh.
Gwirionez — Gaou ivez — Me gred razh an traoù-se
Diforc'h eil d'egile
A zo diaes ivez.
Pa soñjan — E kredan — Ema din ar gwellañ
Choaz ur vestrez nevez
Dimeziñ gwazh-ar-se.